轉貼博客來網頁： https://www.books.com.tw/products/0010990381?loc=P_0005_001 都柏林人（台文版） 原文作者：James Joyce 譯者： 劉盈成 語言：繁體中文 出版社：前衛 出版日期：2024/06/05 9折$405 $450 內容簡介 愛呂蘭文學家詹斯．若依斯（James Joyce） 二十世紀現代小說開基之作《都柏林人》 頭一部全台文譯本，展現全新ê經典風采 　　《都柏林人》（1914）是愛呂蘭文學家詹斯．若依斯頭一部重要作品，由十五篇短篇小 說來組成。伊提愛呂蘭ê首都、伊ê故鄉「都柏林」做舞台，掠一陣無存在感ê市民做主角， 描寫二十世紀初ê都柏林，uì囡仔、青年、大人到社會四常ê故事，表現 五花十色ê內心面 目。若依斯用寫實ê筆路，按步來黜破都柏林茫渺昏迷ê生活，診斷英國殖民所造成ê精神麻 痺。十五篇小說，敆做一个系統性ê整體，伊寫人，嘛是寫城市。 　　本冊成做《都柏林人》頭一部全台文譯本，毋但翻譯原文，閣稽考前行譯本佮文化背景 做註解補充，更加要意台語文自本ê特色，以台語文ê語法、用字佮押韻，搬演故事ê情境佮 歌詩ê聲韻。透由世界文學經典ê徙栽，推 台語文行入現代。 　　◎本書榮獲文化部「語言友善環境及創作應用補助」 目錄 譯序｜劉盈成 01｜兩姊妹　　　　　　Nn g tsí-muē 02｜相搪　　　　　　　Sio-tn g 03｜阿拉比　　　　　　A-lá-pí 04｜依芙蓮　　　　　　I-hû-liân 05｜賽車尾後　　　　　Sài-tshia bué-āu 06｜兩位好漢　　　　　Nn g uī hó-hàn 07｜寄蹛公寓　　　　　Kià-tuà kong-gū 08｜一絲薄雲　　　　　Tsi t-si po h-hûn 09｜相照影　　　　　　Sio-tsiò-iánn 10｜潤塗　　　　　　　Jūn-thôo 11｜痛心記　　　　　　Thòng-sim kì 12｜爬山虎日ê會議室　Pê-suann-hóo-ji t ê huē-gī-sik 13｜母親　　　　　　　Bú-tshin 14｜聖恩　　　　　　　Sìng-un 15｜亡者　　　　　　　Bông-tsiá 附錄：名詞英台對譯表 譯序（節錄） 《都柏林人》：寫人，嘛是寫城市 劉盈成 　　《都柏林人》（1914）是詹斯．若依斯ê頭一部重要作品，提都柏林人ê市民做主角，寫 做十五篇ê短篇小說。都柏林是愛呂蘭ê首都，大英帝國ê一座大城市，嘛是若依斯ê故鄉。十 五篇敆做一个整體，表面是咧寫人，寫一寡中產階級市民，事實是藉市民來描寫城市，欲呈 現這个城市（佮愛呂蘭）ê精神麻痺。自按呢，若依斯開示一條「城市解剖」ê路數，都柏林 去予文學家頭一斗提伊「城市」ê身份來做題材。 　　這个路數，台灣ê文學讀者拍算有熟似。《都柏林人》佮台灣文學（無論是華文或者台 文）ê牽連，咱直接會聯想去白先勇（Pe h Sian-ióng）ê《台北人》（1971）。頭一項，這 本號冊名就佮1914年ê《都柏林人》仝一个手法。限定一个城市，用幾若篇ê短篇小說，描繪 （biâu-huē）城裡五花十色ê人。若依斯十五篇，白先勇十四篇，兩爿攏是敆做一个整體， 解剖城市ê心靈。寫人，嘛是寫城市。 　　都柏林這个城市毋但是誠實有，小說內底市民生活ê所在，包括街仔路、酒館、小店、 建築物、冊店、地號名，猶閣有歷史人物ê遺事，攏是誠實--ê。Hām「英國殖民」佮「天主 教」兩大勢力，嘛正經佇本城咧走跳。所致，小說虛構（hikòo）ê都柏林人，舉動言語攏有 伊「寫實」ê環境。若依斯用這號筆路，忠實打造都柏林人無風無搖ê生活，佮無味無素ê故 事情節。 　　這寡都柏林人，主要是無「存在感」ê市民，nobody（若是《台北人》，有頭面ê人物就 較濟）。 ê人生故事，無啥物精彩ê情節，毋是奇巧刺激、予人讚嘆（tsàn-thàn）彼路。 啊若依斯這部現代性格ê城市文學，干干仔就利用平凡小市民ê故事，來刺（tshiah）這个城 市ê根底。 　　《都柏林人》ê市民毋但有大人，嘛有囡仔、少年人，正經是「大人囡仔攏來看」。猶 未成年--ê，有ê囡仔較巧，佮神父學智識，有ê人偷走學，有--ê數想初戀。大漢了後，有人 正正當當上班食頭路，有人浮浪貢，有人按算欲交陪好額人，通做伙趁大錢。正經度日--ê ，有人佇大學教冊或者私人教師，有人做辛勞，有人四界走傱賣貨，有人是厝稅予人蹛。宗 教方面講著神父，有--ê中風，有--ê愛讀一寡世俗、刺激ê冒險小說，也有愛聽人偷來暗去ê 情愛故事，也有人犯錯誤，袂當閣再主持彌撒、聽人告解。 　　有人踏入婚姻罔度日，有人欲佮情郎相 走、煞臨時叫毋敢，也有人孤身一个無想欲嫁 娶。無情ê人放捨情愛，有情人心懷欲望；欲望若無滿足，有人拍囡仔拄數，有人用文學詩 歌來消磨人生，有人艱苦甲去予火車挵死。有人酒啉甲茫茫，有人醉甲跋落樓梯跤，有人 一下就好。有做老母--ê欲栽培查某囝踏入較好ê社會，嘛有老母利用查某囝ê青春，做套欲 揣一个囝婿。有人認同愛呂蘭ê文化佮獨立地位，有人接受殖民統治，凊彩會得過就好。 　　這都描寫浮世眾生啊，二十一世紀ê讀者凡勢看著誠慣勢矣。毋過越轉去百外冬前，天 主教信仰、英國殖民攏是理所當然ê價值，這是都柏林ê「A面」。啊經過這十五篇故事，經 過無風無搖ê生活描寫，市民ê心靈麻痺才來拆破。都柏林ê「B面」，自按呢就予若依斯共反 （píng）出來。 　　（略） 　　用台語來翻譯世界文學經典，毋是干焦為著台語真親切、有鄉土味，予咱想起阿公阿媽 ，嘛毋是干焦欲宣傳台語有偌媠。台文譯本毋是綴佇華譯本後尾、罔加一種語言ê譯本，嘛 毋是欲喝一句「《都柏林人》也會曉講台語喔」爾。正經講，世界各地文學、語言ê現代化 ，定著需要外國文學經典ê翻譯佮紹介。日本、華語ê文學，攏捌行過仝一條路，台語ê現代 化嘛著愛。 　　欲翻譯外國ê文學經典，有人嫌台語無彼號資格。我想著囡仔時代，老母捌提海明威《 戰地春夢》ê華譯本，改用台語講予我聽。彼當陣阮英文袂曉，毋過，無仝語言有通互相來 理解、轉述，這阮自來毋捌懷疑。 作者簡介 詹斯．若依斯　Tsiam-su Jio k-i-su（James Joyce, 1882/2/2-1941/1/13） 　　愛呂蘭小說家、詩人佮文學批評家。《都柏林人》（1914）是伊ê一本短篇小說集，情 節看著白汫無味，煞會黜破主角ê人生，突顯城市ê精神麻痺，若依斯從此佇世界文壇徛起。 伊ê作品包括《青年藝術家ê畫像》（1916）、《尤里西斯》（1922）以及《芬尼根ê徛靈暝 》（1939）。 譯者簡介 劉盈成 Lâu Îng-sîng 　　高雄人。清華大學哲學碩士，中國文學博士，佇母校擔任助理教授。華語譯作包括《阿 蘭布拉宮的故事》（2018）、《重新丈量世界》（2021）。 落去《都柏林人》ê台語翻譯， 毋但為著這是現代小說ê開基祖，嘛是拋磚引玉，欲予世界文學成做台語文化ê一部份。 --

※ 發信站: 批踢踢實業坊(ptt.cc), 來自: 180.217.56.83 (臺灣) ※ 文章網址: https://webptt.com/m.aspx?n=bbs/TW-language/M.1716379192.A.E3B.html