bit.ly/2SqkKTO https://m.facebook.com/story.php?story_fbid=2848734031847150&substory_index=0&id=448099488577295 最終期 牛佬的話 大家好！終於都嚟到呢一期──大結局！ 牛佬心情點呢？都緊張架！事關計一計，《古惑仔》由1992年創刊，直至依家，足足二十八個年頭！其間喺2003年轉為「三日刊」，都有十七個年頭！嘩……不單嚇死人，幾乎連自己都嚇死埋──真架！諗咗二十八年嘅古仔，古仔一口氣咁落……「三日刊」嗰陣仲要一個禮拜泡製兩期，點攪呀？諗起，真係人都癲呀！ 只係癲還癲，但係「拍」住一眾同袍，做吓做吓……又做到呢個奇蹟出嚟喎！ 講真：呢個「奇蹟」，自己認為將會「後繼無人」，往後嘅，真係冇可能做得到！事關，內裡包含極多艱難嘅因素──第一係諗古仔、第二係草圖、第三繪畫係人物、第四係後期製作。好勒……過咗咁多關之後，仲要過埋最緊要最緊要嗰關，就係銷路！ 大佬！唔係日本嗰Ｄ厚一厚嘅平裝本，十幾廿個畫家支撐喎！而係一本書，一個古仔直落衝鋒陷陣二十八年喎！ 係咪值得驕傲呢？ 寫到呢度，真係要停一停，感謝你哋咁多年支持！真架！無論中途離場嘅讀者又好，一直撐到依家嘅讀者又好，牛佬同埋一眾工作仝人，都好感謝你哋！ 好勒！又講吓今期嘅大結局──臨尾陳浩南見番昔日「老死」嘅一場戲，原本諗住幻覺，之後「拉個遠鏡」，只係剩低陳浩南同賽雅。後尾倫裕國提議：「唔駛幻覺啦！成班人跟住陳浩南一齊行，咁咪仲好！」係喎！一言驚醒夢中人。咁嘅結局，應該可以令到一眾老友記心情歡愉一Ｄ！所以，就用咗呢個結尾勒！ 嗯……希望你哋鍾意啦！ 係呀──凡事有始有終，有開頭就一定有結尾，冇乜特別。只係，自己有少少心底話想講吓：咁多年嚟，《古惑仔》除咗畀到我哋唔錯嘅一日五餐之外，仲好高興識到「古惑仔俱樂部」嘅一班朋友！每一次「聚會」，自己個心都會冒起一句話：「真係多謝你哋咁捧場！」不過，見過我嘅老友記都知知哋我架啦──我個人，情感較為含蓄少少，所以你哋唔係太過察覺「我嘅感激」，實則，真係好感謝你哋架！ 另外，因應《古惑仔》而認識嘅幾位老友，又係要認真講講── 第一個係黃洋達。識到達兄呢個人，相當相當之高興！至於點解？我諗，係亞達為人凡事有商有量，而且喺牛佬心目中──佢好明白事理。你哋唔知咋，喺呢個現世，明白事理嘅人，好少架！ 第二個係《古惑仔》嘅版權經紀人──亞JACK！呢兜友，夠坦白！剩係呢一點，已經值得同佢交呢個朋友啦！ 第三個同第四個，就係我哋「古惑仔俱樂部」嘅正副會長──街市勇＆肇榮勒！呢兩兜友，同倫裕國相當熟絡，同牛佬就較少接觸。只係，見到佢哋面對《古惑仔》嗰種「無私付出」，真係心深認識到乜嘢叫做「義本無言」！真架！喺呢個世代，已經好難搵到真正「義氣」嘅仔女（九噏就多）！呢兩個，絕對勝任有餘。 上述幾位朋友，牛佬識到佢哋，真係多得《古惑仔》作為橋樑，同埋感恩自己嘅福氣！ 咦？都講咗好多咯噃！係時候講吓我哋一眾工作仝人嘅去向── 冇乜特別，完咗敝刊之後，就會構思全新作品。預計，兩個月左右應該又可以同大家見面！ 依家訊息咁發達，大家唔駛怕唔知我哋幾時出書！係咪？鍾情我哋作品嘅老友記，記緊到時繼續支持呀！ 最後，係祝大家身體健康，生活愉快！ 牛佬書於2020年4月尾 ■好！有唔少朋友問：「《古惑仔》大結局，咁呢本『復刻珍藏版』會唔會再出落去呢？」會呀！最低陋度執筆呢一刻，我哋都冇諗過唔出！所以咯喎……係敝刊嘅ＦＡＮＳ，記緊每逢星期六，都去報攤買本支持我哋咯噃！依家嘅港漫，真係有賴你哋嘅熱情支持，牛佬喺度代表敝刊仝人，多謝你哋呀！多謝！ -------------- 沒感想 就不評論了 ----- Sent from JPTT on my Asus ASUS_Z01MDA. --

※ 發信站: 批踢踢實業坊(ptt.cc), 來自: 223.139.87.136 (臺灣) ※ 文章網址: https://webptt.com/m.aspx?n=bbs/HK_Comics/M.1588419573.A.71C.html