bit.ly/2SqkKTO https://m.facebook.com/story.php?story_fbid=2848734031847150&substory_index=0&id=448099488577295 最终期 牛佬的话 大家好！终於都嚟到呢一期──大结局！ 牛佬心情点呢？都紧张架！事关计一计，《古惑仔》由1992年创刊，直至依家，足足二十八个年头！其间喺2003年转为「三日刊」，都有十七个年头！哗……不单吓死人，几乎连自己都吓死埋──真架！谂咗二十八年嘅古仔，古仔一口气咁落……「三日刊」嗰阵仲要一个礼拜泡制两期，点搅呀？谂起，真系人都癫呀！ 只系癫还癫，但系「拍」住一众同袍，做吓做吓……又做到呢个奇蹟出嚟喎！ 讲真：呢个「奇蹟」，自己认为将会「後继无人」，往後嘅，真系冇可能做得到！事关，内里包含极多艰难嘅因素──第一系谂古仔、第二系草图、第三绘画系人物、第四系後期制作。好勒……过咗咁多关之後，仲要过埋最紧要最紧要嗰关，就系销路！ 大佬！唔系日本嗰Ｄ厚一厚嘅平装本，十几廿个画家支撑喎！而系一本书，一个古仔直落冲锋陷阵二十八年喎！ 系咪值得骄傲呢？ 写到呢度，真系要停一停，感谢你哋咁多年支持！真架！无论中途离场嘅读者又好，一直撑到依家嘅读者又好，牛佬同埋一众工作仝人，都好感谢你哋！ 好勒！又讲吓今期嘅大结局──临尾陈浩南见番昔日「老死」嘅一场戏，原本谂住幻觉，之後「拉个远镜」，只系剩低陈浩南同赛雅。後尾伦裕国提议：「唔驶幻觉啦！成班人跟住陈浩南一齐行，咁咪仲好！」系喎！一言惊醒梦中人。咁嘅结局，应该可以令到一众老友记心情欢愉一Ｄ！所以，就用咗呢个结尾勒！ 嗯……希望你哋锺意啦！ 系呀──凡事有始有终，有开头就一定有结尾，冇乜特别。只系，自己有少少心底话想讲吓：咁多年嚟，《古惑仔》除咗畀到我哋唔错嘅一日五餐之外，仲好高兴识到「古惑仔俱乐部」嘅一班朋友！每一次「聚会」，自己个心都会冒起一句话：「真系多谢你哋咁捧场！」不过，见过我嘅老友记都知知哋我架啦──我个人，情感较为含蓄少少，所以你哋唔系太过察觉「我嘅感激」，实则，真系好感谢你哋架！ 另外，因应《古惑仔》而认识嘅几位老友，又系要认真讲讲── 第一个系黄洋达。识到达兄呢个人，相当相当之高兴！至於点解？我谂，系亚达为人凡事有商有量，而且喺牛佬心目中──佢好明白事理。你哋唔知咋，喺呢个现世，明白事理嘅人，好少架！ 第二个系《古惑仔》嘅版权经纪人──亚JACK！呢兜友，够坦白！剩系呢一点，已经值得同佢交呢个朋友啦！ 第三个同第四个，就系我哋「古惑仔俱乐部」嘅正副会长──街市勇＆肇荣勒！呢两兜友，同伦裕国相当熟络，同牛佬就较少接触。只系，见到佢哋面对《古惑仔》嗰种「无私付出」，真系心深认识到乜嘢叫做「义本无言」！真架！喺呢个世代，已经好难搵到真正「义气」嘅仔女（九噏就多）！呢两个，绝对胜任有余。 上述几位朋友，牛佬识到佢哋，真系多得《古惑仔》作为桥梁，同埋感恩自己嘅福气！ 咦？都讲咗好多咯噃！系时候讲吓我哋一众工作仝人嘅去向── 冇乜特别，完咗敝刊之後，就会构思全新作品。预计，两个月左右应该又可以同大家见面！ 依家讯息咁发达，大家唔驶怕唔知我哋几时出书！系咪？锺情我哋作品嘅老友记，记紧到时继续支持呀！ 最後，系祝大家身体健康，生活愉快！ 牛佬书於2020年4月尾 ■好！有唔少朋友问：「《古惑仔》大结局，咁呢本『复刻珍藏版』会唔会再出落去呢？」会呀！最低陋度执笔呢一刻，我哋都冇谂过唔出！所以咯喎……系敝刊嘅ＦＡＮＳ，记紧每逢星期六，都去报摊买本支持我哋咯噃！依家嘅港漫，真系有赖你哋嘅热情支持，牛佬喺度代表敝刊仝人，多谢你哋呀！多谢！ -------------- 没感想 就不评论了 ----- Sent from JPTT on my Asus ASUS_Z01MDA. --

※ 发信站: 批踢踢实业坊(ptt.cc), 来自: 223.139.87.136 (台湾) ※ 文章网址: https://webptt.com/cn.aspx?n=bbs/HK_Comics/M.1588419573.A.71C.html