來源：http://www.am730.com.hk/article-271933 文：77合作社 圖 http://www.am730.com.hk/uploads/articles/271933/143638444398652photo.jpg 過去幾廿年，香港某大電視台出過唔少推理劇，劇情豐富，收視高，的確輝煌一時。不過 大家都唔係唔知，美、日、韓推理劇同小說，一向都係本港編劇度橋嘅靈感泉源，以致劇 情周不時都見到赤川次郎、《紐約重案組》、柯南、《CSI》嘅影子，但編劇們又總不能 搬字過紙，點都要加少少自己嘢，港式推理劇嘅必備元素，亦因而誕生。 1. 專業人士 主角事必要係專業人士，幹探、偵探、法醫、律師、物理學家實中一瓣，再唔係幾瓣夾埋 都得，古裝點算？衙差、捕快、知縣、巡府，仲有埋輕功幫助破案，仲易搞呀！外國劇都 係咁上下戲路，不過港劇近年都多咗保險佬、戲劇大師之類，算進步咗喇！ 2. 每周一單case 大家都知外國推理劇係一集一單案，劇情好緊湊，至於港式推理劇就係一個禮拜兩單案， 一單古仔做足3至4集，古裝包大人呢類仲一個星期一單案，劇情進展慢到你唔信，其實魔 童都曾經送過一班新晉編劇出國學嘢，為觀眾帶嚟少少曙光，不過下場係點唔使多講，所 以暫時都咪使旨意香港有呢種劇。 3. 完美主角 睇咗咁多年，港式推理劇嘅主角們，全部都生理同心理都fit到漏，《棟篤神探》嘅莫探 員叫做最渣嘅一個，事關佢有哮喘，唔可以抱住個女主角逃出火海，外國編劇好早已經意 識到主角太完美好假囉！所以會幫主角加番啲潔癖、狂躁、抑鬱之類嘅缺陷。 4. 疑兇自爆 唔知點解，港式推理劇只要你捉住疑兇問佢係咪兇手，佢實會先係一副「你點知㗎」嘅款 ，之後就會話「係呀！係我做嘅！」或者「對唔住，係我做嘅！」，接住就會將自己啲衰 嘢，連埋你唔知嘅都自爆出嚟，如果現實中嘅賊係咁合作就好囉，唔使請律師兼慳番唔少 啲公帑。 5. 案件重演 港式推理劇喺疑兇自爆之後，唔使等《警訊》，就會直接進入案件重演，畫面顏色奉旨黑 白或者淡色，由當事人將單案由頭到尾，點樣殺人、點樣埋屍、點樣嫁禍同點樣誤導警方 ，都會一五一十呈現喺觀眾眼前，所以，基本上睇完呢分幾鐘，就等如睇晒咁多集嘅故事 。 6. v.o.配畫面 電視台一般都認為案件重演，唔足以令平日家務繁重嘅太太們，又或者視力唔太好嘅公公 婆婆，睇得明單案嘅始末，所以好細心咁加上v.o.，即係旁白，例如演員當刻目露兇光， 對白就係「呢一刻我決定要殺咗佢」，又例如疑兇掘緊泥埋屍，v.o.都會講清楚「我埋咗 條屍」，果然照顧周到。 7. 同志係兇手？ 早前都有報道話，港式推理劇入面有親同性戀者都係兇手，就早幾個月嘅《八卦神探》， 入面周寶霖飾演嘅女同性戀者就係一個連環殺手，仲有《通天幹探》嘅鄭嘉穎同埋《人間 蒸發》嘅袁潔儀都係同性戀者兼殺人犯，就算唔係殺人犯，都無乜幾個係好人，唔知呢啲 算唔算係偏見呢？ 8. 愛情、愛情再愛情 唔知係咪覺得香港人感情生活非常枯燥，編劇們老虎蟹都要幫主角加感情線，最經典都算 《刑偵IV》出動到兩王四后，好似無愛情就無人睇咁，不過話時話，真係有編劇講過，曾 經有套劇因為無愛情線，結果收視仆直仲差啲腰斬，講到咁，真係無嘢好講，惟有承認觀 眾真係好需要愛情嘅滋潤。 9. 孖生解藥 明白好多時編劇們日日扭橋，唔排除會扭到條橋複雜到拆唔到，唔使驚，呢個時候係孖生 兄弟或者孖生姊妹出現嘅時候，好似《迷離檔案》嘅蔣志光同《刑偵IV》嘅邵美琪就患上 咗精神分裂而犯案，就連HKTV嘅《警界線》，最終都要用孖生呢條橋嚟拆掂潘朵拉嘅身份 。 10. 合該有事 一班主角，經歷咗一個做咗三十年差佬都未必遇過嘅奇案，去到結局篇，仲唔將啲主角一 鑊熟推上高潮咩？所以最後一單案，主角唔係俾人屈就係俾人跣到周身蟻，仲要將女主角 同全家拉埋落水，最常見就係脅持綁架，唔信問吓宣萱？ --

※ 發信站: 批踢踢實業坊(ptt.cc), 來自: 180.177.43.27 ※ 文章網址: https://webptt.com/m.aspx?n=bbs/HK-drama/M.1436415331.A.D27.html