馮仁昭四圍超：400萬新林寶落地 城城踩油　直衝老銅 2015-7-15 香港蘋果日報 郭富城「新城嫂」曝光喇！不過fans們唔使擔心，講緊嘅係佢啱啱落地嘅林寶堅尼啫！ 城城呢架新款細牛Huracán LP610-4認真唔簡單，除咗車價超過400萬，速度同樣驚人，由0至100km/h加速都只需3.2秒，啱晒鍾意速度嘅車主，不過喺香港有冇機會發揮所長，就真係買嗰個先知喇！ 「舊愛」打入冷宮 前晚大約10點，城城一身便服，頭都冇gel就揸住新寵、炭灰色嘅「新城嫂」由跑馬地駛去銅鑼灣，每當遇上直路，城城都會踩大油門，畀架車衝吓，不過始終人多車多、燈位又多，「新城嫂」冇乜發揮機會，之後城城將車小心翼翼泊咗喺利園停車場，離開前仲多次回頭望，真係見少一秒都空虛。 其實，城城上年年尾已經買咗架700幾萬、有「牛中之王」之稱嘅林寶堅尼Aventador LP700-4 Roadster，城城仲用自己個英文名「AARON」做車牌，再配廠商為佢特製嘅墨綠色「Aaron tone」。而「新城嫂」嘅車牌，就用咗本來放喺紅色法拉利嘅「SKY」，咁究竟係紅色法拉利俾城城打入冷宮，定係城城將佢架「KING」，即「新城嫂」嘅上一代款換走咗呢？ 撰文：馮仁昭 http://i.imgur.com/FEjhWeg.jpg 穿便服嘅城城前晚揸新車遊銅鑼灣，最後將車泊喺利園停車場 http://i.imgur.com/K522S2R.jpg ■城城將原本放喺紅色法拉利嘅車牌，轉咗擺喺新歡林寶堅尼度。 資料來源: http://goo.gl/IAV6pY --

※ 發信站: 批踢踢實業坊(ptt.cc), 來自: 220.141.118.252 ※ 文章網址: https://webptt.com/m.aspx?n=bbs/AaronKwok/M.1436934441.A.199.html