http://news.ltn.com.tw/news/supplement/paper/998187 我有两组俄罗斯人叫做matryoshka的彩色手工画的套尪仔，大的套细的， 细的套阁较细的，拢总有七八个。 一组拢是画大目俄罗斯姑娘佮（kah，和）一排葱头厝顶的教堂，画甲真媠，毋过无啥物 特别的故事；另外一组，每一个画的是无仝款的政治人物。uì（从）上内面的列宁、史 达林、赫鲁雪夫、布里兹湼夫、戈巴契夫，到上外面的叶尔辛。 尪仔是我1992年旅行俄罗斯时伫圣彼德堡买的，彼时阵，苏联解体无偌久，最後一任总统戈巴 契夫落台，俄罗斯联邦继承苏联，叶尔辛是总统；所以伊的头上大，共所有苏联的前任包 伫内面。彼当时，人民的生活真困苦，拢有妇人徛（khia7，站）伫路边卖物件。酒、衫 、囡仔耍的物件；看起来淡薄仔蔫（lian，枯萎）的一把花，三、四粒梨仔、抑是两穗煮 熟的番麦（玉蜀黍），拢有人咧卖。予我印象真深的是，虽然日子过甲tsiah-ni7（这麽 ）困难，in嘛无忧头结面，有的人阁提一本册咧看，我就按呢想，「是有文化的国家kah 人民呢。」听讲无论偌散（sàn，穷），俄罗斯人犹阁保持看艺术表演的习惯；政府有补 助，一张门票才台票十箍左右。阮伫莫斯科，嘛有去世界有名的波修瓦歌剧院看芭蕾舞《 天鹅湖》。 毋是kan-na（只有）妇人伫路边卖物件，犹有十七、八岁的少年伫街头行来行去，揣（找 ）顾客；in卖的是阮较有兴趣的物件，红星手表、苏联红军勳章等等。 这tsua7（趟）旅行，参加的是我先生的一个商业考察团体，本来逐家就加减有熟似；其 中一位先生家己无爱买，却爱替人刣价；伊讲，「两爿（边）出价刣价，揣一个平衡点， 诚趣味！以後看着你买的物件，想着kah俄国大鼻仔斗智的过程，彼个物件会较有价值。 」 伊阁口角春风，无管人买着啥物、抑是价数比别人买的较贵，伊拢呵咾你买的物件真赞， 有彼个价值。红星手表行行停停？伊讲，「这好！假使伊一直行抑是停落来着袂阁行，就 毋是真正的红星。」有人讲共表仔转发条，袂使siunn（过於）出力，表心才袂断去，伊 阁伫边仔喝烧喊凉，「表心袂断的就毋是真正的俄国货，是日本货；来 tsia（这儿）买 日本货有啥意思！」 有一个太太嫌伊买的琥珀袚链（phuah8-lian7，项链）有较长，伊讲，「袂长，袂长， 牵牛拄仔好（tú-á-hó，恰好）。」 以前读册，拢讲「俄国大鼻子」，毋过看眼前老的少年的，鼻仔和欧美一般白人的形体差 不多，并无特别大；而且，少女一般生做媠媠，少年家嘛清秀。伫街路趁小钱的少年佮阮 出价刣价，敢若（kánn-ná，似乎）嘛真快乐，有人刣的价较譀（hàm，离谱），in嘛 袂变面，颠倒哈哈大笑；无买，嘛袂tuè（跟）伫後面膏膏缠（ko-ko-tînn，纠缠）。 四界拢有人咧卖物件，教堂、皇宫、博物馆外，甚至uì莫斯科到圣彼德堡的长途火车顶 ，服务员无管查甫、查某，也顺绁卖手表、丝巾佮套尪仔。 伫莫斯科，阮tuà（住）的饭店听讲是几星的；但是连餐厅的服务员拢会偷偷仔共阮讲， 她有鱼子酱。後来规气（kui-khì，乾脆）tshuā（带）两个团员去厨房，厨子讲伊遐的 是用玻璃矸仔贮的，毋是铁罐仔，袂变质，是真正好的。虽然想着伊是「饲鸟鼠，咬布袋 」；因为物件确实好，阁无贵，彼两个团员嘛是买几若罐。後来共阮展宝时，顺绁讲一个 笑话。伊讲查某服务员无零星钱通找，竟然讲，「我予你tsim（亲）一下。」结果无佮伊 tsim，嘛无强叫伊找钱。 一路有人推销物件，我嘛加减买。买较济的是丝巾佮大条的围巾，in的花草有的有西欧风 ，有的有俄罗斯农妇风；有人讲准做袂爱围伫颔颈（am7-kún，脖子），提来做桌巾嘛价 值。 毋过我心心念念的是套尪仔。旅馆内商店卖的siunn贵，路边卖的siunn粗；有一日下晡， 参观彼得大帝的夏宫出来了後，才伫一间艺品店买着大目俄罗斯姑娘佮大头人物，两组 上大的都有八、九寸悬（高）。 初初买转来的时，我共in大大小小请出来排，毋过实在有较镇位（tìn-ui7，占空间）， 尾後就亲像「大肠包小肠」按呢，一个一个套起来； kan-na叫我姨婆的Kumo来时，会uì 册橱顶提政治人物彼组尪仔落来，一个一个排伫地板耍；我共伊讲in是诚有权力的人， 一个绁落阁一个统治真大真强的国家。听着按呢，伊就喝号令，耍战争的场面。 看着in，想着经过二十外年，世界版图改变，各国的头人换了阁换，有独裁，有民主，有 贪污，有清廉；是好是bái（坏），伊的人民的感受上要紧。如果国家衰弱，散赤，受苦 的是人民啊。 --

※ 发信站: 批踢踢实业坊(ptt.cc), 来自: 223.141.232.215 ※ 文章网址: https://webptt.com/cn.aspx?n=bbs/TW-language/M.1465393891.A.FFE.html