网志图文版： http://ngtsinlam.blogspot.com/2010/03/blog-post.html 毋过黄元交是按怎老来煞行着好字运，伫蒜头庄是一人讲一款。 顶头厝黄元交囝孙仔讲，有一日来一个老岁仔，用一枝红扁担担了两个携 篮予黄元交，央黄元交替伊保管，老岁仔从此了後煞毋捌阁出现过。过一冬後， 黄元交才共携篮顶的崁布掀开，发现全是白铄铄的银两，黄元交醒悟彼是土地 公来相助，毋才变成好额人。 到今顶头厝黄家祖厝，犹阁祀（tshai7）彼当时担来携篮的红扁担；而且 黄家族人祭祖的时阵，干焦会当拜糙米饭按呢。 新厝内黄家是家己咧传讲，黄元交伫新厝内做长工，黄希哲彼当时藏银两 的窟，长工曷有毋知的？莫讲黄元交去偷提一寡，就是入去藏银两的窟行踏一 辗，转去到厝，跤蹔蹔咧，对跤指头仔缝落的银屑仔，就有够普通人食穿足久 矣。 毋过上会采信得的讲法应该是：拄才故事敢不是讲黄元交伫新厝内负责舂 米？伊共米舂了，米糠就倒落去朴子溪底。新厝内伫朴子溪水尾的「五十六尾」 这个所在有一块地予伊，黄元交伫遐搭猪牢，平常时四界抾人（lang7）无爱 挃的破病猪来饲，就用水头流过来的米糠做饲料，破病猪竟然也予伊养饲甲肥 渍渍（pui-tsih-tsih）----所以有人讲彼块地是一个「猪哥穴」。总讲一句， 黄元交尾後靠着饲猪的副业，粒积袂少家伙。 □ □ □ 「又阁讲黄元交伫新厝内倒米糠。」我讲：「犹是彼个老问题，朴子溪无 伫新厝内边仔啊。」 阿爸斟酌想诚久。「无定着敢若老辈所讲，朴子溪是一尾臭聋龙。」 「臭聋龙？」 「往过的人就拢传讲朴子溪是一尾臭耳聋龙，讲紧煞讲做臭聋龙啦。臭聋 龙平常时耳空真重，拢听袂着声，干焦伫透早天拍殕仔光的时阵，才听会着庄 头鸡咧啼，所以无论庄民按怎搬徙，朴子溪拢一直缀咧走，诚济老庄头就按呢 予水淹崁去。」 「伫咱蒜头遮，敢有庄头去予淹崁去？」 「毋捌听讲过。」 □ □ □ 其实有啦。我搜揣百外冬前日本人画的台湾堡图，伫大?榔西堡揣着「蒜 头庄」，伫蒜头庄东南爿有一个我毋捌听过的地号名，「筏仔路」。佮今马的 蒜头空照图对比，百外冬前「筏仔路」这个所在伫今马的溪底。 (图:日治台湾堡图) 才大概一百冬尔尔，一个庄头无去罗，煞无人会记得。 ----两百四十冬前的代志，我会当揫偌济转来？ 我决定按两百四十冬前代志的路线来行。我骑铁马来到伫蒜头东爿的中庄 仔，朴子溪伫中庄仔东爿，向南流过去。 在地有一句古早话：「嫁中庄仔peh溪崎，嫁蒜头看会社。」往过嫁到中 庄仔的查某人透早就爱到溪墘担水，这马虽然毋免按呢，毋过中庄仔犹原倚近 朴子溪，地理无变。所以讲黄希哲本底是中庄仔人，踮中庄仔顺溪欲揣地，这 是会当采信得的。 我顺外环路骑到新厝内，新厝内徛伫中庄仔西南爿，已经离朴子溪有一块 仔。两百四十冬前，朴子溪敢有影流过这搭？我敢会当相信一喙传一舌、提袂 出证据的传说？无影无迹，阁讲甲对同对同的话，是欲按怎揣着入榫的所在？ 踮大厅拜公妈了後，我顺外环路阁再骑向南，拄着新开的铁马专用道，我 换箍起去铁马专用道。沿路向南势，行过死溪仔、榕树王，才遇着伫遮对本来 南北向踅做东西向的朴子溪。 (图:朴子溪脚踏车自行车道) 我徛踮桥头看，朴子溪彼爿看过去就是蒜头糖厂。公元一八九五年日本人 来台湾，开始计画起会社做糖，所以会当掠准讲一百冬前，朴子溪就是伫这阵 的所在。毋过伊的旧溪床到底伫佗位、啥物时阵改道，也犹阁是一个臆袂出来 的谜题。 (图:蒜头糖厂与朴子溪) 金金相无声流过的溪水，我雄雄感觉诚忝头。对清朝开始，唐山过台湾坐 船入朴子溪的人，发现朴子溪以「龟蛇相吞」的屈势箍蒜头庄半辗，亲像较按 怎踅就踅袂出去。所以传出「对下早仔踅到下昏，踅袂出蒜头庄」的讲法。伊 自古就按呢会引人迷乱，带着神秘的气氛。 这尾神秘的龙，干焦恬恬仔流，袂主动共你讲任何代志。 --- 未完待续，连结可看全文 -- http://ngtsinlam.blogspot.com/ 活水来册房， 本土、语文、旧书、文献。 --

※ 发信站: 批踢踢实业坊(ptt.cc) ◆ From: 163.20.147.65