网志图文版： http://ngtsinlam.blogspot.com/2010/03/blog-post.html （图：朴子溪） 「按呢无啥着。」tshua7队的将士那拭汗那喃（nauh），「恬静甲会惊人 呢。」 有影伤恬静矣。对府城运送官银上北以来，连绁行咧半个月，毋捌拄着遮 尔安静的下晡。将士心肝头煞颠倒惶惶仔，今仔日顺序甲淡薄仔会反奇怪，敢 讲等咧会落雨？ 伊臆毋着去。 落的毋是雨，是刀仔！ 一篷土匪对草埔内底傱出来，做一下喝咻，共拖车的马牛吓惊甲四界乌白 挵。光焱焱的刀仔，做一下就刜伫将士的颔颈。遐的官兵看着tshua7头的已经 无命，哀爸叫母，走甲喷框去，啥物军令、王法拢不比家己的双腿会靠得。彼 旋了紧的一拚几仔里，万幸活落来。走较慢的就予土匪围牢咧，死伫乱刀之下。 鲜血连鞭就予黄涂吸收无去，土匪阁扫涂小崁咧，溪墘顶随恢复做啥物拢 无发生过的样。土匪阁再共官兵的身屍抾做伙，全部掷落去溪底。清泠泠（tshing- ling-ling）的朴子溪拄头仔阁犹会浡血泡起来，毋过随就予流水吞无去。 这条溪是一只激噷噷（hmh8-hmh8）的野兽，恬恬仔共一切吞食掉，静静仔 守护秘密。除了有人阁几个月後，伫溪里掠到特别厚肉的涂虱，无人发现伊有 啥物无仝。 是讲，遮的土匪也无法度享受这批官银啦。拄到手都无一个时辰，蹛伫中 庄仔在地的黄姓族人，靠势有四房遐尔济的人丁，早就共遮的土匪围甲无缝。 几个月後，清朝派人来查访官银予人抢去的代志，干焦知影官兵差不多拢 死绝去，听讲土匪紮着官银毋知影迹。横直大清国物产丰富，讨债会起，这个 案件就按呢（tsuan9）无下落。 中庄仔的黄家煞雄雄大发花，尤其其中tshua7族人包围土匪的三房，更加 是富拢袂退，自按呢三房头人黄希哲决定引tshua7族人离开旧地，另外看地理 通起厝徛家。黄希哲对中庄仔顺溪落来，无偌久感觉着有一个所在溪水诚温暖， 可见是一块福地，就伫溪边起大厝宅，号做「新厝内」，毋但是日後号做「蒜 头」这个所在的大庄头，也成做嘉义沿海这角势的富户家。 （图：蒜头村新厝内） □ □ □ 「小等咧，有问题！」我插话。「新厝内曷无（ah8-bo5）伫朴子溪边啊！」 阿爸讲古就按呢断站，抓头壳讲：「我曷知？对较早老辈的就按呢讲。」 伊指新厝内族谱顶悬「黄希哲」三字讲：「所以开基祖算到你这辈，你看， 开基祖是守字辈，阁来是怡、和、衍、祯，胤、哲、孙、秀......拢总传八代 人，以民间算法一代三十冬，就是八三二四，两百四十冬前的代志矣。」 （图：黄姓燕山派昭穆） 我小算一咧，两百四十冬进前，彼大约是乾隆年间的代志。「好，开基祖 踮新厝内起家了後咧？」 □ □ □ 新厝内的大厝宅真正是「大厝九包五、三落百二门」，头前有鱼池，後壁 有果子，一砖一瓦拢是对唐山运过来的。黄希哲也为伊的第三囝黄正春，买一 个盐运司的卖盐官来做，所以讲新厝内的大厅会使起做翘脊厝，有够风神。 新厝内内底是诚济头喙，也倩足济长工。其中有一个长工叫做黄元交，岁 头犹阁较大黄希哲淡薄仔，自少年就对福建来台湾，毋过食到中年矣，犹阁穷 甲贴地，所以人拢叫伊「歹命交仔」。 有一工中昼，头家娘吩咐黄元交舂米。黄元交舂诚久，看讲差不多矣，伫 房外大声共头家娘禀报：「头家娘，米舂好矣！」 头家娘坐伫椅仔咧盹龟，和看都无看，缀喙应应咧：「无够白，阁舂！」 黄元交加舂不只仔久，阁再禀报：「头家娘，米舂好矣！」 头家娘伫房里犹是彼句话：「无够白，阁舂！」 头家娘交代落来的代志，予你袂重耽得，黄元交阁再舂，阁喝：「头家娘， 舂好矣！」 「犹袂啦！阁舂阁舂！」 黄元交实在挡袂牢，走去到空阔无人的所在，对天咒誓：「我黄元交伫遮 对天咒誓，若有一工我出头天，绝对袂为着食白米来苦毒长工！」喝了家己也 幌头：「是讲我歹命交仔欲出头天，敢有可能？」 圆人会扁，扁人会圆。歹命交仔竟然出头天矣，後来伊也变做好额人，无 做长工罗，伫蒜头北爿蓄地番薯垄五百垄来起厝宅，尾仔发展做一个庄头，地 号名叫「顶头厝」----古早时阵，田庄人定定以种番薯所阆的长短做计算土地 阔度的单位。种一垄番薯大约3尺阔，3.3尺大概是1公尺。所以，黄元交蓄的厝 地差不多有 500公尺遐阔。 （图：顶头厝庄） -- 文章很长，明日待续。 连结中可看全文。 -- http://ngtsinlam.blogspot.com/ 活水来册房， 本土、语文、旧书、文献。 --

※ 发信站: 批踢踢实业坊(ptt.cc) ◆ From: 218.167.72.203 ※ 编辑: sizumaru 来自: 218.167.72.203 (03/21 23:28)