世紀帝國二兮新資料片出代誌！ 這斗按算欲開發兮新文明有五个，原底逐家攏臆講是契丹 (Khit-tan；Qi-dun)、女真 (Lu2 -chin；Jörcen、党項 (Tong2-hang7；Mi-niah)...等等，十世紀至十三世紀兮文明。等到 消息正式公布彼工，眾儂看著標仔寫「三國」，攏掠準家己睏抑袂精神。契丹、女真是抑閣 佇咧，党項兮城堡交特殊兵煞櫼予契丹，契丹泉變做四不像文明。其他兮是魏 (Gui7)、蜀 (Siok8)、吳 (Ngoo5)，雄雄走出來兮三國主題，全世界耍世紀兮攏總臆毋著，大反車。 毋但是三國主題夆料想袂到，三國兮奇觀竟然閣毋是三國時代起兮：魏兮奇觀是元魏時代起 兮嵩岳塔 (Siong-gak8-thah)、蜀兮奇觀是成漢時代起兮武侯祠，吳兮奇觀是朱元璋抑咧做 吳王時代起兮朝天宮。時代差遐濟，予濟濟儂 洗開發團隊，敢是攏無咧讀冊？呔會做這號 資料片？ 實在講，這應當是共中國文明照地區拆開兮試驗。若共黃河地區、長江水尾，交四川地區獨 立做長期兮文明，應該是誠成功，予逐家熟似東亞大陸兮文明毋是干焦漢/中華一个，應該 是有濟濟地區个。確實嘛有儂支持共魏蜀吳三个文明改名，放棄三國時代設定。 這斗三國文明毋但時代傷過早，交一代兮巴彌拉 (Palmyrya；Tadmor) 兮時代相仝。閣有三 國英雄兮機制，完全交世紀帝國二傳統無合，免講嘛濟濟拍世紀兮袂爽閣不服。 契丹交女真嘛有問題。佇上新更新兮謝安戰役內底，這兩个文明竟然夆安排做苻堅 (Hu5-ki an)、姚萇 (Iau5-tiong5) 等角色兮文明，走毋著時代兮問題並三國閣較嚴重。 是講世紀帝國二自一九九九年推出到今，已經二十六年矣。無合歷史兮狀況滿滿是，嘛攏沓 沓仔咧改善。這斗三國夆黜臭、批評，嘛代表電動社群兮歷史智識有咧進步。另外，開始有 儂咧破除「漢文明」兮一元迷思，嘛是誠值得呵咾兮。 世紀帝國，閣戰二十年！ --

※ 發信站: 批踢踢實業坊(ptt.cc), 來自: 42.79.89.149 (臺灣) ※ 文章網址: https://webptt.com/m.aspx?n=bbs/TW-language/M.1745211549.A.3D1.html