左麟右李难得聚首，今次唔系开演唱会，而是由谭咏麟访问经历高低起跌的李克勤，由走 红後将自己放到无限大，到演唱会冇人睇、颁奖礼捧蛋的一沉百踩日子，要阿伦出手帮他 抹屎才得以翻生。 伦：谭咏麟 克：李克勤 新丁入行心理唔平衡 伦：今日想问你一样嘢——平衡，你新丁初入呢行时，宝丽金咁多artists，粒粒巨星， 自己点平衡心态？ 克：第一次签约18岁都未够，乜都唔知一旧云，听到宝丽金三个字都吓晕，一间超大规模 唱片公司，原来我有份喎，以前电视睇嗰啲全部变咗同事喎，哗！完全唔识得谂，嗰时仲 读紧中六，心理好唔平衡，样样都好新鲜，当时宝丽金真系一个大家庭，国际公司做 reception嘅都好似麦当娜咁着到好行，豹纹咁返工，哈哈，送信哥哥仔又一齐踢波，好 大嘅super star小凤姐（徐小凤）又请我哋去玩，成间公司好似family，头几年乜都唔识 ，净系觉得好好玩。 前辈畀意见 伦：咁你入录音室，有冇发觉同平时唱歌唔同？ 克：只记得一只歌录好耐，几日嘅，开头真系唔习惯，第一次喺收音机听到自己首歌《手 表》，咦！咁鬼似谭咏麟嘅，自己听番都觉得好似，但录时一啲都唔觉，直到第三只碟开 始知道乜嘢叫录音，好多前辈走嚟睇我呢个o架仔录音，畀好多意见，你都有嚟。 伦：你点平衡啲意见呢？实有出入o架？ 克：听罗，乜都唔识梗系听人讲，到《大会堂演奏厅》开始知道原来可以咁唱，以前唔识 点唱，听唱片好似执药咁，攞人哋呢句嗰句，炒埋一碟。 初次攞奖感自大 伦：呢个就系最早期心态，完全冇平衡，到你第一次攞奖时，心态系点样？ 克：到攞奖开始真系唔平衡，嗰时应承咗阿妈，《大会堂演奏厅》呢张碟唔得就去读书。 伦（大笑）：哈哈哈哈。 克：好彩得啫，嗰时同TVB拍咗套剧，连埋只碟一齐上，开始卖白金唱片，开始攞奖。 伦：第一个奖系边只歌？ 克：《一生不变》攞十大中文金曲，你颁奖畀我，我仲记得买咗件好贵嘅衫，觉得贵就系 好，开始踏入心理上唔系好平衡时间，将自己放到无限大，觉得自己样样都得，因为身边 所有人话得，又开始攞奖，觉得好似好容易咁。 克（扮轻佻语气）：以前喺电视见到攞乜金曲、金唱片，都唔系好难啫，嗰时开始有咁心 态，睇杂志又吹捧，话接班人呀，嗰段时间都有几年系唔平衡，心理上自己接受唔到，突 然之间嗰步槛得咁快，包括人哋点睇自己，自己点睇自己，以前买呢样嘢要储好耐钱，依 家除咗买呢样可以买埋嗰样，太短时间得到太多嘢，当时只系20岁，完全唔适应，平衡唔 到心态。 伦：咁会唔会自大呢？ 克（自揭疮疤）：得罪好多人，自己讲嘅嘢唔觉，但啲人觉得好难听，呢个世界好公平， 踩屎好容易，要抹番好难罗，花好长时间抹番，嗰时得罪好多人，经过好长时间观察至做 番朋友，我觉得系一个必经阶段。 伦：你知唔知，你濑咗屎，我同你抹屎？ 克（一面感激）：我梗系知，几多人帮我，好多。 伦（取笑）：我同你夹左麟右李时，啲记者行家数到你……数好多嘢出嚟，哈哈。 克（叹气）：所以屎好容易踩，要抹番好难，自己讲一句说话，人哋摆咗入脑，要做番好 多好嘢，先冚番啲坏印象。 家庭第一 伦：跟住冇嘢啦，左麟右李，到你结婚，喺家庭生活方面点去平衡工作呢？ 克：依家平衡要喺时间上，工作始终要做，由以前男朋友到依家丈夫、爸爸嘅身份，男人 系家庭经济支柱，负最大责任嘅角色，工作带畀自己满足感，仲系经济来源，工作一定要 做，其他时间分配一定系家庭摆第一，仲会做咁多私人嘢咩，好自然地将工作以外时间畀 晒家庭。 伦（心有同感）：无可厚非。 无綫打救 粉丝不弃 伦：娱乐圈就系咁，第一个印象畀人好紧要。呢个系你初初变自大、失控冇咗平衡力，到 後来当你遇到挫折，演唱会、唱片唔同以前，你用乜心态去平衡？ 克：难过实有，最简单攞咗几年金曲，之後自己度定期去，但有得去却冇奖攞，都未算衰 喎，到有一、两年，（扮惊声）点解唔使嗌我去嘅？系咪周国丰唔记得打畀我呀？直头系 唔记得你，唔算系一个卡士，嗌你去系有份参加比赛，不过输咗畀人啫，唔嗌你去直头觉 得你冇份比赛，最坏系呢两年，开头当然好唔习惯。 伦：有冇谂过返去读书？ 克：咁又冇，攞唔到金曲头一、两年，成日打电话返公司埋怨，唔觉得自己问题，只觉得 点解唱片公司唔同我fight呀？之後开始接受娱乐圈起跌系咁，嗰时ＴＶＢ真系好，搵我 做咗好多好有意义嘅《劲歌金曲》、《香港小姐》、《世界盃》，做呢啲节目keep住开心 心态，又真系几好玩，虽然啲人问个个礼拜我同吕方攞住灭火筒喷人，你又冇歌唱，新人 都有歌唱，你有冇心酸？我完全冇又唔系，但识得岗位唔一样就要调节，坦白讲冇谂过做 完世界盃有人锺意李克勤讲波而买我唱片，冇谂咁长远，有嘢就做，反正咁得闲，当然歌 迷都扮演重要角色，咁多年就算最低潮都叫我唔好放弃。 伦：咁你咁耐以嚟有冇收埋歌迷啲信？低潮时有冇一、两封信touch到你？ 克：通常睇完摆喺心就算，反而有次好深刻，拍完嘢天光去食早餐，隔篱枱有个廿几岁男 仔攞ＣＤ畀我签名，晨早６点钟，佢话好锺意听我歌，唔好放弃，令我好记得。 伦：到後来慢慢啲嘢上番嚟。 港乐骚起死回生 克：港乐系转捩点，多得你介绍，推荐话啲歌啱用。嗰个演唱会好重要，冲破咗我心理障 碍，之前６、７年一直唔敢开演唱会，因对上一个卖得好差，直头惊咗。嗰个（港乐）系 个转捩点，观众觉得克勤同管弦乐团可以摆埋一齐，个骚系成功，令到大家重新觉得李克 勤可以唱歌。不过当时唱片公司老细陈少宝话：「吓，港乐仲要出只Live CD？唔好啩， 蚀钱喎！」嗰时好多人帮手同佢讲。 伦（余怒未消）：我直情话佢有冇搞错。 克：终於只碟卖得好好，由嗰时开始啲人慢慢返嚟。 来源：http://0rz.tw/Bt6IM -- ╔╗╔╗╭══╮╭══╮╔╗╔╗╔══╮╔╮╔╗ ╭ ╔══╮╔══╮ ║╚╝║║ ═ ║║ ║╚╯╝║══ ║╚╮║ ║ ║══ ║══ ║╔╗║║╔╗║║ ║╔╮╗║══ ║║╗║ ║ ║══ ║══ ╚╝╚╝╚╝╚╝╰══╯╚╝╚╝╚══╯╚╝╰╝ ╚══╯╚══╯╚══╯ 视听剧场→Idols_2HKCNΣ中港人气大会堂→HK_BoysΣ香港男孩特区→HackenLee李克勤 --

※ 发信站: 批踢踢实业坊(ptt.cc) ◆ From: 114.24.105.187