(请忽略耸动的新闻标题 其实是篇蛮深入的报导) 【何韵诗破社会规条大胆去爱】 东方日报2011-06-11 挟已故巨星梅艳芳徒弟之名勇闯乐坛的何韵诗，转眼在乐坛打滚十个年头，面对香港乐坛 每况愈下，她直指全因各大唱片公司斤斤计较所致，一度萌退出念头的她避走台湾「抖气 」，未料在台湾创出佳绩，足证勇於创新的她绝不墨守成规，难怪她高呼：「证明用自己 步伐去行系work！」 大胆讲祖儿 事业得意，爱情路上阿诗跟密友容祖儿似被认定是一对，对於「同性恋」这三字，阿诗认 为在这年代思想应该要开放…… 呢个系我觉得唔应该再去考究嘅课题，如果喺呢个年代都觉得呢三个字（同性恋）系禁忌 ，咁我觉得大家唔好继续活喺三十年代，要返番呢个年代！每个人都有可能爱上任何性别 嘅人，只不过你会唔会受呢个社会嘅所谓规条去框住你。 冇确切答案 其实所谓爱，系你去爱嗰个人嘅内在而唔系外在，我唔会答到呢个（指同性恋）好确实嘅 问题，依家同永远都系唔可能确实咁话我只系锺意某一性别嘅人，等如有啲男人或女人结 过婚、生完仔，佢哋都可以同同性嘅人一齐，依家你同男仔或女仔拍拖，唔代表他日会唔 会同另一性别嘅人一齐。祖儿依家同我系好朋友关系，父母甚少追问我啲感情事，反而传 媒问得多过佢哋。 台湾大步走 阿诗只身避走台湾，心灵得以医治，让她重拾自信及能量，以自家步伐在台湾打开一片天 地，带来了满足感…… 离开之前我对香港彻底失望，真系对呢个地方成个制度、成件事好失望，好彩当时离开去 咗台湾发展，压力细咗，困住喺一个地方实会钻牛角尖，但系离开咗睇到个大环境，搵番 好多自己需要嘅能量，台湾市场对我来讲发展绝对好啲，同埋佢哋真系有时间去消化你嘅 嘢。 打破墨守成规 香港基本上一只碟嘅寿命大概得一个月，之後大家就好心急问点解咁耐冇新歌？有时睇番 真系对呢个乐坛心痛，有人会觉得我点解咁迟先出国语碟，我庆幸等咗咁多年考虑清楚所 有方向先出呢只碟，如果好多年前自己唔系好肯定应该点做，赶住去做碟，得出来嘅效果 唔系依家咁。 我一路用自己步伐去行，证实咗咁样系最适合我嘅方法，系work嘅，加埋入围（金曲奖） 系最开心一样嘢，证明自己选择方法虽然比其他人慢，但可以有个成果，希望能做到一个 个案畀香港歌手睇——有好多方法去做同一件事，成日好多人会话你咁做唔得架，要点要 点，香港最兴系咁，大家只系觉得墨守成规就得，其实真系有其他嘅路可以行罗。 嗟叹港乐坛 受到香港乐坛不健康的影响，令一众有才华、有潜质的歌手大感沮丧，阿诗也一度萌退出 歌坛念头，归根究柢是…… 香港乐坛唔健康好多年，令我觉得好可惜，做香港歌手系好辛苦，压力来自唔系我点去做 好音乐，系做好嘅音乐点令呢个台buy我，咁就多咗一层考虑，唔系单纯做好音乐、顾及 音乐质素，香港人系先抱住唔系欣赏嘅角度，太挑剔喇，令歌手因为咁觉得有压力同沮丧 。点解香港人都唔支持香港嘅音乐人？加上我哋乐坛唔够团结，尤其系唱片公司成日斤斤 计较，呢样嘢系整死乐坛其中一个原因！ 旧思想好忟憎 谂吓八十年代，前辈歌手会提携新人，我就系个好例子，系梅姐（梅艳芳）提携出来，前 辈一定去帮一啲佢觉得有潜质嘅新人，但依家要计好多嘢：系咪自己公司？有冇利益冲突 ？明明有好多有影响力嘅歌手，可能佢哋都想帮，若果唱片公司介意，佢哋怕麻烦咪费事 做罗，慢慢变成自己顾自己，只要自己好就得架喇！加上依家好多人都仲系旧式思想，真 系好忟憎，为乐坛好唔应该有咁多计较！ 香港乐坛有一个趋向就系年底想喺边个台攞咩奖，就因应需求做啲歌去符合嗰个媒体口味 ，变咗大家一窝蜂去做同一样嘢，乐坛点会健康？ 争金曲落泪 能打入台湾金曲奖候选《最佳国语女歌手》及《最佳单曲制作人》，是阿诗预料之外，抱 平常心的她睇好乐坛前辈万芳…… 我睇好前辈万芳，佢唱功嗰种感动系最难，莫文蔚（Karen）攞过，万芳未攞过，同埋 Karen有其他提名，当然都希望佢攞，始终今次大家都系香港歌手进军国语市场，五占其 二已经好开心，我唔会因为咁觉得飘飘然，做咗咁多年都系脚踏实地行，只系觉得好感动 ，冇谂过喺另一个地方发展，反而被认同多过自己地方！ 认受性更加高 知道入围嗰一刻眼泪真系涌出来，咁就未至於饮泣，第一时间打畀一齐做呢只碟嘅同事， 咁梗有同容祖儿分享，佢都好开心，佢都系睇住我用自己嘅方法去行，相信佢冇喊，总之 大家都好激动同戥我开心。其实台湾金曲奖比香港颁奖礼认受性更高，因为每年评审嘅人 唔一样，唔会知道边个系评审而去巴结佢，唔同香港。 家人要忍让 阿诗出生於小康之家，跟家人感情深厚，关系牢不可破，她却自爆彼此因经常见面而不时 发生摩擦、闹交…… 同家人都系继续学习点去更好地相处，呢个系我哋永远学习嘅课题，你对最亲嘅人永远都 有一种放任态度，好难控制自己反应，当然系每一次都会怪责自己，每个人都会经历到呢 啲事，同埋尤其系我父母，咁参与我嘅生活，亦因为咁容易有冲突，好彩每次闹完过几日 又冇事。反而我同阿哥会互相忍让，佢系个几火爆嘅人，深藏不露，但其实佢系个活火山 ，我又系个好性急嘅人，因为咁同佢反而比较少直接摩擦，大家都知互相火爆，加上好少 一齐做嘢就会尽量迁就。 口述：何韵诗 笔录：罗宛君 摄影：沈健程 发型：Karman Wong@Hip Hair Culture 化妆：Meimei Chu 形象：Ricky Sham@1st atelier 场地：兰桂坊酒店＠九如坊 原新闻连结：http://goo.gl/rrNSX 新闻图片：http://goo.gl/tWahS http://goo.gl/bwSF0 http://goo.gl/vjhby http://goo.gl/rWyE7 --

※ 发信站: 批踢踢实业坊(ptt.cc) ※ 编辑: SmileEgg 来自: 115.43.222.8 (06/11 09:41)